එකමුතුකමේ ශක්තිය
මිනිසා සමාජීය ජීවියෙකි. එබැවින් මිනිසාට තනිව ජීවිතය ගොඩනගා ගැනීමට නොහැකි බව පුරාණ කාලයෙන්ම සනාථ වී තිබේ. එකිනෙකා සමඟ සම්බන්ධ වී, එකිනෙකාට උපකාර කරමින් , එකම අරමුණක් වෙනුවෙන් එකමුතු වීම මිනිස් සමාජයේ ප්රගතියට මූලික හේතුවයි. මේ නිසාම එකමුතුකම ජීවිතයේ සාර්ථකත්වයට හා සමාජයේ ස්ථායීතාවයට අතිශය වැදගත් සංකල්පයකි.
එකමුතුකම යනු සරලව කිවහොත්, විවිධ අදහස්, හැඟීම් හා පසුබිම් ඇති පුද්ගලයන් එකම අරමුණක් වෙනුවෙන් එක්ව කටයුතු කිරීමයි. මේ තුළ විශ්වාසය, ගෞරවය, ආදරය සහ ගරුත්වය වර්ධනය වේ. එකමුතුකම තිබෙන තැන, ගැටලු විසඳීම පහසු වන අතර අභියෝග ජය ගැනීම ද වේගවත් හා සාර්ථක වේ.
කුඩා පවුලක් තුළ සිට විශාල රටක් දක්වා, එකමුතුකමේ වැදගත්කම සෑම තැනකම දක්නට ලැබේ. පවුලක් ලෙස එකට සිටීමෙන් දරුවන්ට ආරක්ෂාවත්, ආදරයත් ලැබේ. දෙමාපියන් අතර එකමුතුකම තිබේ නම්, දරුවන්ගේ මානසික වර්ධනයත් සාර්ථක වේ. එමෙන්ම ගැටලු ඇතිවූ විට ඒවා සාකච්ඡා කර විසඳා ගත හැකි ශක්තියද පවුල තුළම උපදවයි.
පාසල් හා කාර්යාල වැනි ආයතනික පරිසරයන්හිදීත් එකමුතුකම විශාල බලයක් වේ. ගුරුවරුන් හා ශිෂ්යයන් අතර හොඳ සම්බන්ධතාවයක් තිබේ නම්, ඉගෙනීම සාර්ථක වේ. කාර්යාලයක සේවකයන් එකිනෙකා සමඟ සහයෝගයෙන් කටයුතු කරන විට, ආයතනයේ නිෂ්පාදනශීලීත්වය වැඩි වේ. තනි පුද්ගලයෙකුට කළ නොහැකි කාර්යයන්, කණ්ඩායමක් ලෙස ක්රියා කරන විට සාර්ථකව ඉටු කළ හැක.
සමාජ මට්ටමින් බලන විට, එකමුතුකම රටක සංවර්ධනයට මූලික වේ. ස්වභාවික විපත්, ආර්ථික ගැටලු හෝ සමාජීය අභියෝග වැනි අවස්ථාවල ජනතාව එකට එක්ව ක්රියා කරන විට එම අභියෝග ජය ගැනීම පහසු වේ. එකිනෙකාට උදව් කරමින්, දුකෙහිදී එක්ව, සතුටේදීත් එක්ව එම හැගීම් බෙදා හදා ගනිමින් ජීවත් වන සමාජයක් තුළ සාමය හා සතුට වැඩි වේ.
ඉතිහාසය පුරාම එකමුතුකමේ ශක්තිය පෙන්වන උදාහරණ ගණනාවක් ඇත. ජාතික නිදහස ලබාගැනීමට, සමාජ සංශෝධන සිදු කිරීමට, විශාල ව්යාපෘති සාර්ථක කර ගැනීමට වැනි විශාල අභියෝග සඳහා ජනතාව එකට එක්ව ක්රියා කළ යුතු විය. තනි පුද්ගලයකුගේ උත්සාහය සීමිත වුවද, කණ්ඩායමක ශක්තිය අසීමිත විය හැක.
එහෙත් අද සමාජයේ, සංකීර්ණ ජීවන රටාව, තාක්ෂණික ආකර්ෂණයන් සහ පුද්ගලවාදී අදහස් නිසා එකමුතුකම කෙමෙන් අඩුවෙමින් යන බව දක්නට ලැබේ. මිනිසුන් තමන්ගේ ලෝකයට සීමා වී, අසල්වැසියන්වත් නොහඳුනන අවස්ථා තිබේ. මෙවැනි තත්ත්වයන් මඟහරවා ගැනීමට, අපි විවෘත මනසක් ඇතිව, එකිනෙකාගේ අවශ්යතාවයන්ට අනුව, හැකි පමණින් උපකාර කිරීමෙන් එකමුතුකම නැවත ගොඩනගා ගත යුතුය.
එකමුතුකම වර්ධනය කිරීමට අපට තනි තනි පුද්ගලයන් ලෙස දායක විය හැක. ගෞරවයෙන් කතා කිරීම, වෙනස් අදහස් පිළිගැනීම, අවශ්ය අවස්ථාවල උදව් කිරීම, වෛරය හා ඉරිසියාව ඉවත් කර ආදරයෙන් කටයුතු කිරීම ඒ අතර වැදගත් වේ. මේ සියල්ල එකමුතු සමාජයක් බිහිකිරීමට උපකාරී වේ. කුඩා ක්රියාවන් එකතුවෙන් විශාල වෙනසක් ඇති කළ හැක.
අවසන් වශයෙන්, එකමුතුකම යනු සරල වචනයක් නොව, ජීවිතය ජයගැනීමට අවශ්ය බලවත් ශක්තියකි. එය පවුලට සතුට ගෙන එයි, සමාජයට සාමය ලබා දෙයි, රටකට ප්රගතිය උරුම කරයි. අපි එකිනෙකාට අත දිගහැර, එකම අරමුණක් වෙනුවෙන් එක්ව ක්රියා කරන විට, කිසිදු අභියෝගයක් අපට අභියෝගයක් නොවනු ඇත. ඒ නිසාම, “එකමුතුකමේ ශක්තිය” අපගේ දෛනික ජීවිතයේ අත්යවශ්ය මඟපෙන්වීමක් ලෙස පිළිගෙන එය ක්රියාවට නැංවීම අප සැමගේ වගකීම වේ.
- ආලෝකා සයුරංගි -
Comments