පරිසර හිතකාමි ජීවන රටාවක්
අද ලෝකය මුහුණ දී සිටින විශාලතම අභියෝගවලින් එකක් වන්නේ පරිසර විනාශයයි. වායු දූෂණය, ජල දූෂණය, වනාන්තර විනාශය, දේශගුණික වෙනස්වීම් වැනි ගැටලු දිනෙන් දින තදින් බලපාමින් ඇත. මේ සියල්ලටම ප්රධාන හේතුව වන්නේ මිනිසාගේ ස්වභාවික සම්පත් අධික භාවිතය හා අව භාවිතයයි. එවැනි පසුබිමක, පරිසර හිතකාමි ජීවන රටාවක් අනුගමනය කිරීම අද කාලයේ අත්යවශ්ය කරුණක් බවට පත්ව ඇත.
පරිසර හිතකාමි ජීවන රටාවක් යනු, ස්වභාවධර්මයට හානි නොකර, සම්පත් වගකීමෙන් භාවිතා කරමින්, අනාගත පරපුර වෙනුවෙන් පෘථිවිය ආරක්ෂා කරගැනීමේ ජීවන ක්රමයකි. මෙය විශාල ව්යාපෘති හෝ රජයේ පමණක් වගකීමක් නොව, පුද්ගල මට්ටමින් ආරම්භ විය යුතු ක්රියාවලියකි.
අපගේ දෛනික ජීවිතයේ කුඩා පියවර වලින් පරිසරය රැක ගැනීම ආරම්භ කළ හැක. උදාහරණයක් ලෙස, පොලිතින් හා ප්ලාස්ටික් භාවිතය අවම කිරීම ඉතා වැදගත්ය. එක් වරක් භාවිතා කර ඉවතලන දෑ වෙනුවට නැවත භාවිතා කළ හැකි බෑග්, බෝතල්, භාජන භාවිතා කිරීමෙන් විශාල පරිසර ආරක්ෂාවක් සිදු කළ හැක. එමෙන්ම කසළ වර්ග කර, කාබනික කසළ පොහොර ලෙස භාවිතා කිරීමත්, නැවත ප්රතිචක්රීකරණය කළ හැකි ද්රව්ය වෙනම එකතු කිරීමත් වැදගත් වේ.
ජලය හා විදුලිය වැනි සම්පත් සුරක්ෂිතව භාවිතා කිරීමද පරිසර හිතකාමි ජීවන රටාවක අත්යවශ්ය කොටසකි. අවශ්ය නැති විට විදුලි බල්බ, විදුලි පංකා, රූපවාහිනිය වැනි උපකරණ නිවා දැමීම, ජලය වැය කරන විට සැලකිලිමත් වීම, වැසි ජලය එකතු කර භාවිතා කිරීම වැනි ක්රියාවන් මඟින් සම්පත් අපහරණය අවම කළ හැක.
ආහාර පුරුදු සම්බන්ධයෙන්ද පරිසර හිතකාමි වීම ඉතා වැදගත්ය. හැකි තරම් දේශීය ආහාර භාවිතා කිරීම, ගෙවතු වගාවට යොමු වීම, ආහාර අපතේ යාම වැළැක්වීම වැනි ක්රියාවන් මඟින් පරිසරයට ඇති බලපෑම අඩු කළ හැක. ගෙවත්තක පැළයක් හෝ මල් ගසක් වැවීමත්, වනාන්තර රැකගැනීම පිළිබඳ සංවේදී වීමත් අපට කළ හැකි සරල නමුත් බලවත් පියවර වේ.
ප්රවාහන ක්රමයන් ද පරිසරයට දැඩි ලෙස බලපායි. හැකි විට පයින් යාම, පාපැදිය භාවිතා කිරීම, හෝ පොදු ප්රවාහන සේවා භාවිතා කිරීම මඟින් වායු දූෂණය අවම කළ හැක. එමෙන්ම වාහන නඩත්තු කරගැනීමත්, අනවශ්ය ගමන් අඩු කිරීමත් පරිසර හිතකාමි චර්යාවන් ලෙස සැලකිය හැක.
පරිසර හිතකාමි ජීවන රටාවක් යනු පුරුදු වෙනස් කිරීමක් පමණක් නොව, සිත්ගන්නාසුලු මානසිකත්වයකි. එය “මේ මිහිතලය අපට විතරක් නෙවෙයි මිනිසුන්, සතුන් අපි හැමෝටම අයිතිය.” යන අදහසෙන් ජීවත් වීමයි. අප කරන සෑම කුඩා ක්රියාවකටම ලෝකය වෙනස් කරන බලයක් ඇති බව අවබෝධ කරගැනීම මෙහි මූලික පියවරයි.
එමෙන්ම දරුවන්ට කුඩා කාලයේ සිටම පරිසරයට ආදරය කිරීමට පුරුදු කිරීම අනාගතයට කරන විශාල ආයෝජනයකි. එමගින් ඔවුන්ට ගස් වැවීමට ඉගැන්වීම, කසළ නිසි ලෙස ඉවත් කිරීම පිළිබඳ දැනුවත් කිරීම, සතුන්ට කරුණාවෙන් සැලකීම වැනි දේවල් ඔවුන්ගේ ජීවිතයේ ස්වභාවික පුරුදු බවට පත් කළ හැක.
අවසානයේ, පරිසර හිතකාමි ජීවන රටාවක් යනු අද අපි කරන තේරීම් මත හෙට ලෝකය ගොඩනැගීමයි. ස්වභාවධර්මය විසින් අපට ලබා දී ඇති වටිනා සම්පත් ආරක්ෂා කරමින්, සමබර හා සෞඛ්ය සම්පන්න ජීවිතයක් ගත කිරීම අප සැමගේ වගකීමකි. අද අප පරිසරය රැකගතහොත්, හෙට අපේ මතු පරපුර රැකෙයි. ඒ නිසා කුඩා පියවරකින් හෝ ආරම්භ කරමින් පරිසර හිතකාමි ජීවන රටාවක් අපගේ දෛනික ජීවිතයේ අත්යවශ්ය කොටසක් බවට පත් කරගැනීම අතිශය උචිත කාලීන අවශ්යතාවයකි.
- ආලෝකා සයුරංගි -
Comments